Revelation of John 3
1Zuwa ikklisiya tukwoda n Sardisu: Tnu-tnuye gmi n oza aba nu nwo n na Zafun Shekwoyi nyai n gun tnabai shi, n na a kpasu yi n gun tnaba. Mi kpe hoye lo n ge ikklisiya wye-wyeyi n tnutnu-zhinyi, amma ho fifi yilo. 2Nsaiye kun agyewyi la enya n kwo ce gnilo nyi kwo la gafi. Oho atnutnu mwakpalo n ɓemanayi n Shekwoyi awyeba. 3Jeze lo da enya n ho ɓei wo ha ga gaiciya n kmisunyi, la kwo shi deidei ha jeze ɓe da mi n jesun, mi ɓa, ɓe daho n tna esa dnai ngye evi, ma taho.4“E, har nsai ye azaho n Sardisu ɓato gmi oɓa aje amwi n anyi cegye yi n, ɓa ɓa zan-zan n mi yi n na aje abuyi ntuge ɓa kunce lo. 5Ozahozahoyi n wa gyi nasara, aɓei kpewo aje abuyi, mi to ɓei wun owo eye ya n Littafi wye-wyeyi nyan, amma mi ɓei zhin wo se-ida n emi Dada abye n wo a malaikayi nge wo zhin emi nya nu. 6Fa aza vinya n ɓa wo atnubua ɓo ɓa wo oɓo n Zafun gna a ikklisiya.
7“Ka wasikaye ge tukwoda nwo dna n eklisiya n Filadalfiya nyi: ‘Tnu-tnu ye nkwo nyi oza n wo Gyi-gyi-yi, n gaiciya yi n Dawuda makuliyi shi, wa gu enya ya n zaho ta mi n gun, wa gu enya n zaho ta mi n guyan, wonu na tnu.’
8“Mikpeho yelo sarai, hoto n kalayi lon, ama hoku kukari zhin ha zhin oɓo n mi da, hoi to na emi eye aɓon, Ntucenu mila abokun-mi guho ya n zaho ta gun.
9“Wo ga, miɓa tu azayi tile n ɓa ce shetan zokwo gwolo ɓai gwo gna ge ɓa zhin emi nya nu nyi (amma ɓato zhin emi anya nun – ɓace akatanu,) ɓa ya zhi n ho a pita ba ɓakpe nge oho nu zhin oza n mi ye.
10“Ntuge hoku ɓo vi n hakuriyi ko da yace ho sin wahala lo ntucenu mi ɓa guho n wahala yakwo esa n jarabai nkwo ɓaɓe n na anyi tukwo a mwi zaho-zahoi gye n wo n wyewyeyi. 11Shi wye, mi ɓelo esa fyewyi, kushi dei-dei enya nho n cei lo n hakalayi n na bai n zaho ta gwoho oho rawanin.
12“Oza n wa gyi nasara, miɓa ze wo jigo n mi Shekwoyi yakun, nyaho ta bwawon wo ta shagmin nyalo-nyalo miɓa ka emi Shekwoyi eye tu n wo, wa ze ekni ɓi n emi Shekwoyi aba. Woɓei bwa emi eye n katu n wo.
13“Fa oza n wo n na atnubuai wa wo oɓo n Zafun gna a Ikklisiya.”
14Ka wasikaye ga ikklisiya tukwoda n Lawudikiya: “Tnu-tnuye gmi n oza aba nu n wo gni agni n kalayi, Seida zhinyi egbe nuyi, gaiciya dayi (n na anya vinya nɓa nyi, kwo ɓei nyi, kwo n kwoye ɓeɓe lo) Shekwoyi nyazhin yi kmisunyi.
15“Mi kpe hoyelo sarai, hoto pyena lon, hoi to fu-fui lon. Awo mi pwa ngye ho ye gunna lo kwo n fufuyi. 16Amma shi ho wolo bwala-bwala n u nyi, mi ɓa kunho ya n emi egbe. 17‘Ha cige, ʼmin nyabwayilo, n na anya, vinya n mi n cei pma.’ Hota kpelo ge dna n Zafun ho zhin wyekwoyi nu, enya sun-sun nyan, wyebuai, bwotoloi n.
18“Omi shaula nho aba okwonu ha si zinariya hin-hin n mi, n na alakwo pmiaya n ena yi, nsayi nu nho ɓa ze nyabwayi, hi-hin, Hasi n mi, a je abui n gyi-gyi-yi, n nabai n hota gni n bwotolo yin, n vinyikwo yin, ha bwa shigbe n mi kwa kaho awyesan gna, kwa jeze ɓeho n wyeba gyei. 19Mi zhin ma ta ozaho-zho yi nmi ye, ntu ce nu nɓa ta ho, akpe ha je ze n ɓenukwoyi zokwo, ha zan aɓo shin nɓa zhin Shekwoyi nya.
20“Shiwye esa la mi sun gni n na abokun mi, mi-i lu, oza-ho-zaho-yi n wa wo mi yiwo wa gu abaya, mi ɓa ɓe dawo ya zhin zumunta n woi, owo n miyi. 21Mi ɓa ye zaho-zahoi n wa gyi nasara wa sasetu n miyi n mi akujara-ebenya shi mi ɓei sase tu n gnisun n mi Dada nyi n mi ɓei gyi nasara nyi. 22Fa zaho-zahoyi n wo wo atnubua ɓo wa wo oɓo n Zafun gna a eklisiya.”
Copyright information for
GbrGAW